Te Hītori o ngā Kāinga Kāwanatanga
Ka toro whakamuri te hītori o tā Aotearoa whai wāhi ki te whare kāwanatanga ki te tau 1894.
Te whare noho kāwanatanga tōmua
I te tau 1905 nā Pirimia Richard Seddon te Workers Dwellings Act i whakamana, ā, ka hangaia ngā whare kāwanatanga tuatahi hei rēti mā ngā kaimahi i roto i te pokapū o te tāone. Ki ngā whakaaro o Seddon, ka taea e te hunga nō Aotearoa te pārekareka i te kounga noho nui ake mēnā ka whakakapi te kāwanatanga i ngā kairetiwhare tāone 'apu'. I hangaia ngā tini rau kāinga engari he nui rawa ngā rēti mō te tini, ā, i hinga te hōtaka i te tau 1919.
Ngā whare a te Workers' Dwelling Act(external link).
Ngā tapa tāone hou
I ara ake te hiahia e piki haere ana mō ngā whare noho i muri i te Pakanga Tuatahi o te Ao kia whakatūria e te Railways Department tētahi wheketere ki Frankton, Kirikiriroa, e hanga ana i ngā whare kua auahatia kētia mai i te rākau o te takiwā rā. I hangaia ētahi tapa tāone tūtahi o ngā whare rerewē ki Frankton, ki Moera, ki Te Awakairangi anō hoki. I kati te kaupapa i tā te Kāwanatanga whakatau he iti iho te whakapaunga mā ngā kamupene tūmataiti hei hanga i ngā whare.
Nā te nama kāwanatanga māmā i ngā tau o te 1920 – i pai ai tā ngā kaimahi mino i te 95% o te utu o tētahi whare – i pahū mai te hangatanga ki ngā tapa tāone. I mimiti haere tēnei i te Aumate Ohaoha Nui o ngā tau 1930.
1935
I hiahia te Kāwanatanga Reipa tuatahi, i arahina e Michael Joseph Savage, ki te whakarato i ngā kāinga, i te whita hoki mō te hunga kua koremahi i muri i te Aumate Ohaoha. Nā rātou i hoatu taurewa i te pūtea mō ngā hokonga whare tūmataiti, ā, i hanga ngā whare hei rēti mā te marea. I hangaia te whare kāwanatanga te 5,000 i te tau 1939. I tukuna e ngā kaihoahoa whare ngā hoahoa e 400 rerekē, ā, kāore ētahi kāinga e rua i ōrite tonu.
Whai muri i te pakanga
Whai muri i te Pakanga Tuarua o te Ao, ka hangaia ngā whare kāwanatanga 10,000 e te Kāwanatanga. I whakatakotoria ngā tapa tāone tūtahi, i whakatūria ngā toa, ngā rawa tukuora hoki, ā, i mahi horanukuhia te wāhi tūwhera.
Nā ngā kōpaka rawa i hoko whakaroto te Kāwanatanga i te 500 whare kua auahatia kētia i Ateria. I whakarewa hoki rātou i tētahi kaupapa 'hanga ā-rōpū', e taurangi ana i ngā whare hou ka hangaia ki ā te Kāwanatanga hoahoa. Ko te hua ko ngā hanga tini-whare kua hangaia ki ngā rawa iti iho te utu pērā i te fibrolite, ā, i hapa ai te tūmataiti.
I te tīmatanga o te rautau 1950, i tukuna e te Kāwanatanga Nāhinara kia hoko ngā kairēti a te kāwanatanga i ō rātou kāinga, i tukuna atu ngā pūtea taurewa a te kāwanatanga, i āwhina i ngā utu o te ahumahi hanga hei whakaheke i ngā utu whare. He kiato ake te hanga i ngā whare noho hou, ā, i puta mai ngā wāhi whare noho kāwanatanga nui ki te tonga o Tāmaki Makaurau, ki Porirua hoki, ki te raki o Te Whanganui-a-Tara.
Dixon Street Flats, Te Whanganui-a-Tara(external link).
Ngā tau o te 1970 ki ngā tau 2000
I hangaia te Housing Corporation i te tau 1974 whai muri i tētahi uiui ki te whare noho kāwanatanga. I hanga whare te Corporation ki ngā wāhi i rō-tāone, ā, i whakawhanake rātou i ētahi momo whare noho, pērā i te whare noho rāpoi.
I hoko atu te Kāwanatanga Nāhinara i ngā whare kāwanatanga i te rautau 1990, engari i mau tonu te hōtaka hanga whare kāwanatanga iti iho. Ko ngā tāngata whiwhi takuhe anake i āhei ki te rēti i tētahi kāinga kāwanatanga, ki te rēti mākete katoa, me ngā pūtea āwhina wāhi noho nā te pūnaha tokoora. Nā Reipa i whakatū anō ngā rēti hāngai-moni whiwhi i te tau 1999, nā konā ko ngā kairēti e māraurau ana kāore i utu i te neke atu i te 25 ōrau o tā rātou moni whiwhi ki te rēti.
Ko te mea tino hou ki te whakapapa kāinga kāwanatanga o Aotearoa ko te Housing New Zealand Corporation, i whakatūria i te tau 2001.
2018-19
I te tau 2018, ka whakapuakina e te kāwanatanga te hanganga o tētahi Manatū hou – Te Tūāpapa Kura Kāinga (MHUD), kua hangaia ki ētahi wāhanga o MBIE, o Te Tai Ōhanga, o MSD hoki.
I te tau whai muri mai, i whakakotahingia a Housing New Zealand Corporation, a HLC me Kiwibuild kia tū hei te Housing and Urban Development Authority, Kāinga Ora – Homes and Communities (Kāinga Ora).
He tūranga haere ngātahi tō Kāinga Ora, tō Te Tūāpapa Kura Kāinga mō te whare noho, mō te whanaketanga ā-tāone hoki. E kawe ana Te Tūāpapa Kura Kāinga i te ārahitanga ki te pūnaha whare noho me te whanaketanga ā-tāone, ki te kaupapahere, ki te aroturuki, ki te tohutohu hoki i te Kāwanatanga mō te ahunga rautaki anō hoki. E arotahi ana a Kāinga Ora ki te tuku i te whare noho tūmatanui, ki te tuku i te āwhina pūtea hāngai kāinga, ki te tīmata, ki te whakahaere rānei i te whanaketanga ā-tāone ki tōna kotahi, mō ētahi atu rānei, ā, me te tuku i ētahi āhuatanga o te Hōtaka Hanga a te Kāwanatanga.
Te rārangi wā mō ngā pokapū whare noho kāwanatanga
Ahakoa kua rerekē ngā ingoa o ngā tari, kei te rite tonu te whāinga: ko te whakarato whare noho kounga, tareka ā-utu.
1894 – Ka whakatūria te State Advances Office.
1923 – Ka whakakotahitia te Peka Whare o Te Tari Mahi ki te State Advances Office.
1935 – Ka whakatūria te Mortgage Corporation.
1936 – Ka whakakotahitia te Mortgage Corporation ki te State Advances Office, kia whānau mai ko te State Advances Corporation.
1938 – Ka whakatūria te Tari Hanga Whare, i muri mai ka kīia ko Te Wāhanga Whare Noho o Te Manatū Mahi.
1974 – Ka whakatūria Housing Corporation of New Zealand, ka whakakapi i te Kaunihera Whare ā-Motu.
1992 – Ka wehea a Housing Corporation ki te: Kaporeihana Whare o Aotearoa, Housing New Zealand Ltd, me Ministry of Housing.
1994 – Ka whakatūria a Community Housing Ltd hei kamupene āpiti nā Te Kaporeihana Whare.
1998 – Ka whakawhitia atu ngā mana o te Ministry of Housing ki te Ministry of Social Policy.
2001 – Ka whakakotahitia te Housing Corporation, Housing New Zealand Ltd, and Community Housing Ltd kia whānau mai ko Housing New Zealand Corporation.
2006 – Ka whakarewahia te Housing Innovation Fund hei tautoko i ngā whare pāpori rāngai tuatoru.
2011 – I neke te tuku pūtea ki ngā whare pāpori rāngai tuatoru ki te Social Housing Unit, ā, ka neke ngā mahi kaupapa here whare ki te Department of Building and Housing.
2014 – Ka riro i Te Manatū Whakahiato Ora ngā tono whare noho pāpori me te whakahaere i ngā rēti ā-moni whiwhi.
2018 – Ka whakatūria Te Tūāpapa Kura Kāinga (MHUD).
2019 – Ka whakakotahitia te New Zealand Corporation, HLC, me Kiwibuild kia tū mai ko Kāinga Ora.
2024 – 2025 – Ka whakahoutia e te Kāwanatanga a Nahinara ngā kaupapa matua a Kāinga Ora, e aro ana ki te toitū ā-pūtea, ngā kaupapa here kaireti tōtika ake, me ngā hoa pātui rāngai tūmataiti.
Kua whakahoungia te whārangi: 12 Haratua 2025